【行踏白色恐怖地圖】5月19日是白色恐怖記憶日，台南有一陣學生共課本的歷史事件，透過無仝形式的藝術表現來呈現歷史，認捌家己的學校、城市佮故鄉。白色恐怖的行讀學習，予下一代的序細透過思考學習，閣較了解人權的珍貴。台灣的白色恐怖時期自 1949 年宣布戒嚴到戡亂條款結束進前，超過 40 冬的時間，有人佇學校參加讀冊會就予人掠走，嘛有人無代無誌就予人牽連。學生佮這寡受難地點製成地圖，予受難者的遭遇成做在地活的歷史，予閣較濟人知影咱這馬的自由是按怎來的，啥物閣是白色恐怖咧？【新英文法的血淚】柯旗化的新英文法是真濟台灣人學英文的共同記持，會當講是台灣兩代人學英文一定會讀的！毋過大部份的人可能毋知影，這本新英文法的作者捌受著白色恐怖政治的摧殘，予人關十七年。毋過雖然伊予人打壓到這个程度，但是伊原仔是閣堅持出獄了後規心投入民主運動。柯旗化22歲予特務逮捕，原因是佇伊遐搜著一本《唯物辯證法》，官方認定伊有倚左派的思想，有叛亂的嫌疑，就共伊送去綠島思想改造。雖然後來已經出獄，毋過煞是一再予特務跟蹤佮監控，猶是活佇咧白色恐怖的驚惶當中。一直到美麗島事件爆發，柯旗化才脫離憂鬱的心，重新徛起來推動二二八平反。 3/23 禮拜日暗時七點半，綴台灣記事簿先來行踏白色恐怖的地圖，落尾才閣來認捌新英文法的血淚！  

了解更多 →