《穎仔穎仔育》
發布時間: 2023-05-31
▎公視臺語台6/18開始，每禮拜日10:00首播
《穎仔穎仔育》獻予幼兒的12分鐘
「穎仔」，一般是誠幼的芽；「育」，有晟養教育的意思。
《穎仔穎仔育》是臺語台第一个針對猶未上國小進前，幼兒階段的全台語兒童節目，結合各種領域、仝款關心母語傳承佮兒童的有志，打造出講故事、生活化的囡仔歌、認知動畫閣有去外口探索四个單元，向望一點一滴的用心灌溉，陪伴小小的穎仔沓沓仔大漢。
【故事】夾腳拖劇團打造親子時光
以「人」字做意象的夾腳拖劇團，透過一个一个故事，演出土地的面貌、人權議題、講出母言的珍貴性。 這回以人和尪仔的共同演出，閣加入口技、聲光等等，重現你我生活當中的大細項代誌，比如講：雄雄失電、蛀齒的痛苦、恐怖的虼蚻等等，替親子的對話拍開一扇趣味的大門。
【歌曲】成長需要音樂、律動來灌溉
唱歌跳舞，是學齡前囡仔的重要大代誌！音樂的欣賞參身體的律動，比一般咱大人想的閣較有意義。 節目中的二十條台語囡仔歌，有經典、有原創、有改編，有金馬獎最佳原創電影歌曲著獎人王昭華老師的加入、有台語路親子樂團團長楊晉淵統籌音樂，欲予大人囡仔做伙快樂唱歌每一工！
【認知動畫】以囡仔的好奇心做出發
「咦，這是啥物聲音？」「喔！原來遮爾濟水果攏有毛。」「哇！生活中三角形的物件遐爾仔濟。」三十秒的認知內容，有聽覺、視覺、記持、語言，予囡仔慢慢仔學著觀察佮體驗，自然而然聽然後慣習遮的台語。
【外景單元】生活台語，台語生活
母語家庭的爸爸媽媽講：「台語路是一條溫柔閣堅持的路。」是一陣佮囡仔用台語生活的爸母，𤆬囡仔去踅超市、去海邊仔、做礤冰的日常，就佮普通的家庭仝款平凡、會歡喜嘛會傷腦筋，煞因為傳承台語變甲美麗閣充滿詩意。 「一个人會當行真緊，毋過一陣人就會當行真遠。」阮聚集各地方的力量，向望未來用母語來教育囡仔變成若喘氣仝款的存在。
