《非常了不起》
發布時間: 2023-05-31
▎公視臺語台 拜一～拜三17:30播出
蔡昌憲、米可白做伙主持的台語兒少益智節目《非常了不起》，進入全新的第二季，遊戲的關卡全部升級，除了需要提升團隊合作的互動性，嘛調整口說表達的關卡，予囡仔展現閣較濟對話的空間，關卡的數量對第一季的五个增加到七个，每一集對七个關卡內隨機出題，毋但提升節目的豐富佮精彩程度，嘛予節目整體更加彈性佮多元。
注重純真面貌，囡仔才是節目的寶藏
第二季共主題包裝的硬智識擲掉，關注的重點囥佇囡仔本身，節目設計閣較注重參與遊戲的過程參感受，因為遮的寶貝才是節目的寶藏！阮向望透過節目看著全台灣無仝地區、無仝個性格囡仔，顯現出𪜶純真的面貌。另外，主持模式佇這季嘛做調整，主持人佇錄影進前，了解參賽者的專長興趣等等的背景資料，予囡仔咧錄影的時會當自然的開講對話，遊戲的過程能更加熟手，上尾通過台語關卡得著寶藏，予囡仔感覺真光榮！
