關於台語台

公視台語台是「台灣公共電視廣播集團」的一个頻道，以台灣話發音。

台語台頻道位址定頻佇14台，宣傳標語是「公視台語台，上蓋有意思」，望逐家會當用臺灣台語講出家己的心聲、也用上親切的氣口，講出屬於這片土地的故事。

台語台的成立經過民間廿外冬的推動，佇2018年得著行政院佮文化部的支持。

2018年12月25，立法院三讀通過行政院提出的《國家語言發展法》，明定保障臺灣各固有族群的自然語言、臺灣手語的傳承、復振佮發展,，尊重臺灣語言文化的多樣性。這項法律也明定政府捐助從事傳播的財團法人，著提供國家語言多元服務，嘛會當設立各種國家語言廣播、電視專屬頻道佮各種形式的通信傳播服務。

文化部根據《國家語言發展法》的立法精神，初步佇2019年編列4億專案預算，由公共電視策劃台語頻道。公視共原本的「公視二台」改做台語專屬頻道，閣成立「台語頻道籌備中心」。經過半冬外的規劃，「公視台語台」佇2019年7月初1試播。 

7月初6，台語台佇基隆市海洋廣場舉行開台典禮，主題是「台語開港，做陣出帆」，望台語文化航向曠闊的世界，也成做全世界頭一个以台語發音為主的電視頻道。

2023年6月初3，台語台結合公廣集團成員，整合南部媒體人才佮在地資源，正式啟用南部中心，望發揮群聚效應，以在地觀點製作閣較濟優質台語節目。