女思想的 - 綠島女子分隊、予國家搶走的青春歲月｜台灣記事簿
【女思想的 - 綠島女子分隊】戒嚴時期欲銃人伊攏袂共你通知，彼名單貼踮台北車頭的壁頂，寫著今仔日銃殺某某人，彼攏大學教授、高中老師這寡菁英，外省人嘛予掠去銃殺，而且死體攏無人收，連一點做人的尊嚴攏無。1951年火燒島成立新生訓導處關思想的政治犯，其中第六中隊是查某分隊，這是全世界真罕有的關查某思想犯的監獄；這馬，有愈來愈多的政治受難者徛出來替家己講話，講統治者毋敢講的歷史予逐家知影，苦勸現代人千萬毋通忘記這馬的自由，是偌濟前輩用性命換來的。
【予國家搶走的青春歲月】1960年代的監牢內底會當講是逐間攏有死刑犯，若予人判死刑就會銬跤鐐，逐家攏真驚惶後一个會輪到家己，所以每一擺若有人予判無期徒刑，就會喝恭喜，講閣抾轉一條命。雖罔逃過死劫，毋過原本應該佇世界行踏的少年囡仔煞予人掠去關，𪜶好好的青春歲月就按呢全部攏烏有去矣。今年4月，政府宣布5月19訂做白色恐怖記憶日，邀請真濟政治受難者做伙來參加紀念活動，受難者嘛感慨表示，這馬得來無簡單的民主佮自由，你無去在意、無咧注意，有一工你的囝兒嘛可能會受著佮阮同等的痛苦折磨。
11/17 禮拜日暗時七點半，綴台灣記事簿先來了解女思想的 - 綠島女子分隊，落尾才閣來回顧予國家搶走的青春歲月！
了解更多 →
