丹娜絲風颱掃過了後、墩仔腳大地動90周年｜台灣記事簿
【丹娜絲風颱掃過了後】7月初丹娜絲風颱過後，台電新塭變電所斜對面通看著怪手當咧處理破甲碎糊糊的光電板，疊甲親像山仝款。因為斷電幾若工，予漁民損失誠嚴重，雞牢也仝款損失誠嚴重，對原本在養隻數差不多5萬外隻到目前干焦賰1萬隻左右。嘉義縣老人人口超過22%是全國上懸的縣市，而且義竹鄉老人人口閣超過30%，鄉內看過去強欲攏是老人，𪜶欲佇風災過後重建也相對困難。有真濟老厝的厝頂去予人掀去，其中有家己一个人蹛的序大，也有人是身心障礙，中低收入戶等等弱勢家庭，風災嘛予𪜶的生活是變甲閣較困難。
【墩仔腳大地動90周年】
1935 年 4 月 21 透早 6 點 02 分的「新竹台中大地動」 ，造成斯當時的3279 个人死亡，1萬 2 千外人著輕重傷，規个倒去佮倒一半的厝有甲 5 萬外戶。遮的損失若以斯當時的新台票來算，差不多是 3700 萬。傷亡人數超過 921 大地動，有幾若个庄仔頭差不多攏全部滅掉，其中以內埔庄的「墩仔腳」是上蓋嚴重。「墩仔腳」地動到今年已經90年矣，這是台灣近代歷史上死亡人數上濟的大地動，越頭看這段過去，嘛提醒咱國民眾，見地動著愛提高警覺，猶閣有預防地動災害的重要性。
8/10 禮拜日暗時七點半，綴台灣記事簿先來關心丹娜絲風颱掃過了後的嘉義縣義竹鄉現況，落尾才閣來回顧墩仔腳大地動90周年！
了解更多 →
