「遠山呼喚」執行營養午餐計畫，望囡仔莫枵腹肚｜青春咱的夢
【行入世界的邊界(下)】
頂禮拜阮紹介台灣的NGO組織「遠山呼喚」，𪜶去到菲律賓夏爾高島進行教育援助，推動校船計畫佮重建教室這寡項目。抑若這禮拜的影片，是記錄𪜶為著欲改善捌字比例傷低的問題，猶閣有予疫情影響的學生拄著的教育困境，所開展的閱讀計畫。
因為有進前佇尼泊爾的閱讀計畫經驗，𪜶知影干焦捐冊是無夠的，閣較需要建立濟濟種機制，創造予囡仔家己接觸閱讀的環境。遮的每一个教室攏有囥冊架仔，內底有適合無仝年的學生看的冊，定期替換，而且佮𪜶的閱讀能力嘛拄好對同。
毋但按呢，𪜶閣鼓勵學生用寫佮畫的方式記錄心得，學生便若完成三篇就會當換一本冊紮轉去看。這嘛鼓勵學生對閱讀的興趣。
第四項計畫是針對菲律賓長期以來囡仔營養不良的問題，夏爾高島的情形是比都市地區閣較嚴重，有三成的囡仔捌遭受過傷瘦、傷矮的狀況。
為著解決這个問題，遠山呼喚佮當地的社會企業合作，推動營養午餐計畫。這个計畫毋但提供營養午餐，閣教囡仔營養佮健康的智識。就算疫情猶閣咧湠，𪜶猶原佇工作坊加入衛生教育的內容。
計畫做一學期了後，根據學校的統計，過去過瘦的人數有到61个，毋過這馬只賰２个，數據證明這項營養午餐計畫是誠成功。
公視臺語台「青春！咱的夢」9/16這禮拜六暗時7點半，咱做伙來看這陣行向世界的青年。
了解更多 →
