風災、疫情予菲律賓教育斷站，台灣NGO推動夏爾高島重建、閱讀計畫｜青春咱的夢

【行入世界的邊界(上)】

2015年佇尼泊爾廓爾喀(Gorkha)推動偏鄉教育的「遠山呼喚」團隊，共當地失學的比例對42%降低到賰2%，改變超過六千个囡仔的命運。

今年𪜶前往菲律賓，佇上東爿的夏爾高島(Siargao Lsland)釘根，而且閣照無仝的地形環境、教育需要，推行四項教育計畫。

遮有世界十大趨湧景點，嘛有散赤、落伍的現實。夏爾高島的散赤比例是菲律賓全國的兩倍，0-5歲的囡仔營養不良比例有30%遐爾懸。2021年雷伊風颱損蕩島上百外間學校，閣加上疫情造成全國停課咧欲三年，這粒島囡仔的捌字的比例干焦有32%。

阮綴咧遠山呼喚的跤步來到菲律賓夏爾高島，紀錄𪜶如何結合政府、學校佮NGO的力量，改變囡仔的未來。

這禮拜上集記錄了重建計畫佮校船計畫。

島上有六千外位的學生，但是大部份學校的基礎建設佇2021年受著雷伊風颱的侵襲，多數學校是損蕩甲真嚴重，估計島上所有學校的重建至少愛十年才會當完成，而且一間學校的重建經費需要台票400萬，目前猶有115間學校咧等待重建的預算。

小島的學生因為受著天氣無穩定佮油費傷懸的影響，定定無去學校，遠山呼喚佇當地推行校船計畫，建造新船，交由當地營運，建立穩定的交通機制，予學生來上課的比例提升到9成。

𪜶以教育為核心，看見在地的需求，思考解決的方法，呼籲世人關注全球教育的無平等，實現公平佮包容，嘛看見台灣少年世代的正向力量。

公視臺語台「青春！咱的夢」9/9這禮拜六暗時7點半，咱做伙來看這陣行向世界的青年。