2026-10-04
歹油食落腹 食安破一空、海水燒熱𤉙珊瑚｜台灣記事簿
【歹油食落腹 食安破一空】
前一站仔中聯油脂生產的大豆沙拉油，驗出一級致癌物質苯駢芘超標，引起濟濟民眾驚惶；中聯油脂一工會當生產500噸的油，伊所生產的民生沙拉油，市占率有三成三，這改的食安問題，對市場的衝擊是真大。
調查發現，中聯油脂苯駢芘超標的原因，包含放冗巴西黃豆的熱損粒，閣有中聯並無建立苯駢芘監控的措施，致使苯駢芘超標的風險增加。苯駢芘屬於多環芳香族碳氧化合物的指標，會佇咧有機物質燒了無完全，或者是高溫裂解的時陣產生，已經是予國際癌症機構，列做一級的致癌物質。
【海水燒熱𤉙珊瑚】
你敢有感覺這幾年的天氣愈來愈熱？全球暖化致使海洋溫度夯懸，嘛予珊瑚的存亡出現危機，珊瑚白化，甚至死亡，海洋的環境愈來愈䆀。珊瑚若是死亡，原底佮伊蹛做伙的魚類、海膽、海參等等，嘛攏有可能消失。
越頭看小琉球海域過去十年調查的數據，時間線一下搝出來，就會當看著整體的珊瑚覆蓋率攏咧減少，有的所在甚至無超過一成。另外，除了全球暖化，人為活動佮陸地頂懸的開發，攏會破壞珊瑚礁生態系，若想欲及時挽救，需要專家學者佮閣較濟關心海洋的公民科學家做伙來參與。
10/4禮拜暗時七點半，台灣記事簿先𤆬你來關心中聯油脂驗出一級致癌物質苯駢芘超標的食安問題，紲落才來看全球暖化致使海洋溫度夯懸，嘛予珊瑚的存亡出現危機。
了解更多 →