做伙搬台灣的故事、火燒島政治犯醫療團｜台灣記事簿
【做伙搬台灣的故事】無論是海島演劇或者是同黨劇團，攏是用台灣的語言咧講台灣的故事，用一改閣一改的演出，予逐家了解著真少人知影的歷史，嘛予逐家看著無仝款的台灣。佇咧台灣做戲劇實在無簡單，海島演劇的戲劇大部份攏無收門票，所以欲經營這个劇團誠無簡單；同黨劇團主要是靠賣門票加上去申請補助，才有法度維持落去。因為毋願意看著台語消失，所以海島演劇主要攏是用台語來演戲，而且海島演劇的演員，毋但愛會曉講台語，猶閣愛講了會標準。佮海島演劇盡量攏按照原底的歷史做法無仝款，同黨劇團是將白色恐怖當做故事的元素之一，所以內容就較無遐爾仔沉重。
【火燒島政治犯醫療團】火燒島的菁英政治犯有真濟醫生、老師佮農業專家，𪜶對火燒島的醫療、教育佮農業有誠大的貢獻。較早火燒島的居民攏有去醫務所揣政治犯看病的經驗，新生訓導處醫療所就袂輸是台大教學病院的火燒島分院，有料小的手術房、產房佮病房。大部份的政治犯攏是智識份子，隊部的官兵予有教育背景的政治犯來為家己的囡仔補習，火燒島的學生囡仔嘛會當參加。政治犯為當地人佇醫療佮教育的付出，連部隊官兵的一家伙仔攏受著照顧，毋過思想改造猶原是新生訓導處主要的目標。
4/27禮拜日暗時七點半，綴台灣記事簿先做伙來搬台灣的故事，落尾才閣來熟似火燒島政治犯醫療團！
了解更多 →