艋舺公園改建 街友去佗位、機能布料 予台灣紡織業反身｜台灣記事簿
【艋舺公園改建 街友去佗位】對6月19開始，艋舺公園進行14個月的工程，台北市政府計畫改建艋舺公園，欲佇中正萬華打造全新的觀光景點 「東京表參道」；但是這敢代表14個月了後，街友的問題就會消失？根據統計，蹛咧艋舺公園遮有59个街友，為著安置這陣街友，台北市社會局共社福中心會開放予𪜶來過暝；毋過，也毋是全部的街友攏願意接受安置。艋舺公園原本是龍山寺公園，佇昭和2年啟用，因為隔壁就是龍山寺，早時來台北拍拚的人會佇遮揣頭路。落尾閣因為有人會去公園佈施，久來就成做濟濟艱苦人踮的所在。艋舺公園的工程按算進行14個月，雖講在地人真期待新的公園通予當地帶來新氣象，但是也煩惱14個月了後，街友猶是閣轉來，未來的表參道可能仝款成做街友蹛的所在。
【機能布料 翻轉台灣紡織業】台灣紡織業每一年產值超過三千億，經過長期創新研發，嘛成做國際上機能布料足重要的生產區，這馬全世界有七成的機能布料攏是台灣做的。親像世界第一領咖啡粕做出來的衫就是台灣業者研發的，十幾年來攏受著國際客戶真大的肯定。雖然經過產業外移，紡織業每一年的貿易順差猶是排佇頭前三、四名，上主要的原因就是結合高科技，繼續研發。台灣的紡織業有業者真早就投入研發機能布料，二、三十年來嘛做出足好的成績；毋過欲按怎繼續領先，循環經濟是未來重要的方向，閣有深化國際布局，拓展東南亞、 印度等新興市場攏真重要，業者嘛希望透過政府資源整合，組成台灣紡織國家隊，做伙推動海外拓銷，提升整體的競爭力！
7/20禮拜日暗時七點半，綴台灣記事簿先做來看艋舺公園改建後街友欲去佗位的深度報導，落尾才閣來關注予台灣紡織業反身的機能布料！
了解更多 →
