長照X藥師 契機佮挑戰、山中提琴村｜台灣記事簿
【長照X藥師 契機佮挑戰】
台灣已經是超高齡的社會，逐年有長照需求去申請的人，已經超過36萬；這幾冬漸漸有西藥房結合長照的服務，毋但會當提供老大人相關資源，藥師嘛會當鬥整合in的用藥仔，也教序大正確的食藥仔觀念。
佇長照服務這方面，藥師希望專業閣較受著注重，做伙共老大人的生活品質顧予好。
【山中提琴村】
嘉義縣大埔鄉，總人口干焦4000外人，是全嘉義縣人口上少的鄉鎮。毋過，大埔的和平社區，對2018年開始引進bai-óo-lín課程，bai-óo-lín家黃聖彥逐禮拜對台北落來，毋但教人挨琴，嘛教人用大水柴做bai-óo-lín，吸引袂少民眾來遮上課，也予這个人口外移嚴重的鄉鎮，開始一篇新的樂章。
5/10禮拜暗時七點半，台灣記事簿𤆬你來看長照需求愈來愈濟的台灣，藥師會當按怎共遮的長輩提供幫贊，紲落才去嘉義大埔的和平社區，看遮是按怎透過bai-óo-lín復興觀光，也予在地序大、囡仔展現笑容。
了解更多 →