漆工藝的保存佮復振、一場猶未結束的革命｜台灣記事簿
【漆工藝的保存佮復振】台灣的漆工藝歷史對日本時代開始發展，民國60年代達到外銷的黃金時期，雖講因為社會變遷，漆工藝到今發展稀微，但是猶有一陣人對藝術創作、產品開發、基層教育等等角度切入，佇現代社會當中掖漆工藝的種子，就是希望有一工台灣的漆工藝通閣再發穎、閣一擺復興。今年已經105歲的漆藝國寶王清霜，接觸漆工藝已經超過80年，受伊影響，王家三代攏咧做漆工藝。為著傳承漆工藝，袂少漆工藝家對原本量產漆工藝品，發展轉做幼路化的漆工藝美術品。賴家的第三代賴信佑也有相𫝛的想法，伊認為漆工藝針對高端市場通做較藝術的物件，針對一般民眾也愛創作實用為主的漆工藝產品。
【一場猶未結束的革命】2019年香港爆發「反送中」抗爭，予人叫做「赴湯」的湯偉雄佮伊的牽手為著欲護送一个16歲的查某囡仔離開現場，結果三个人煞成做全香港頭一个予人以暴動罪起訴的案例，就算最後暴動罪無成立，毋過赴湯猶是感覺香港已經無安全矣，所以選擇來到台灣。毋過就算佇咧異鄉，真濟香港人並無袂記得𪜶的家鄉，無論是徛出來抗爭，或者是保存無法度閣再公開的文物，攏是咧為香港的民主佇咧奮鬥繼續拚這場毋知當時才會結束的革命。
5/18 禮拜日暗時七點半，綴台灣記事簿先來解漆工藝的保存佮復振，落尾才閣來看一場猶未結束的革命！
了解更多 →