爸母的live house歌廳時代、漆工藝的保存佮復振｜台灣記事簿

【爸母的live house歌廳時代】
紅包場雖然無親像較早遐爾仔交易，毋過西門町的紅包場毋但予遮的歌手舞台，嘛帶動袂少周邊的產業，這馬西門町猶閣有袂少賣川菜、福州菜的餐廳；往過榮民阿伯佇咧歌手表演煞了後，就會𤆬遮的歌手出來做伙食飯開講。
歌廳show的發展，頭先是對國民政府來台灣的茶館文化，以演唱上海的流行歌為主，一直到1960年代台視開始播送群星會，聽群星會的歌手咧唱歌成做彼當陣上大的享受。

【漆工藝的保存佮復振】
台灣的漆工藝歷史對日本時代開始發展，民國60年代達到外銷的黃金時期，雖講因為社會變遷，漆工藝到今發展稀微，但是猶有一陣人對藝術創作、產品開發、基層教育等等角度切入，佇現代社會當中掖漆工藝的種子，就是希望有一工台灣的漆工藝通閣再發穎、閣一擺復興。
今年已經105歲的漆藝國寶王清霜，接觸漆工藝已經超過80年，受伊影響，王家三代攏咧做漆工藝。為著傳承漆工藝，袂少漆工藝家對原本量產漆工藝品，發展轉做幼路化的漆工藝美術品。賴家的第三代賴信佑也有相𫝛的想法，伊認為漆工藝針對高端市場通做較藝術的物件，針對一般民眾也愛創作實用為主的漆工藝產品。
8/31 禮拜日暗時七點半，綴台灣記事簿先來體驗爸母的live house歌廳時代，落尾才閣來了解漆工藝的保存佮復振！