台灣建築留經典-森山松之助、過年的滋味—菜頭粿｜台灣記事簿
【台灣建築留經典-森山松之助】台灣佇日治時期留下真濟經典的百年建築，包括這馬的總統府、監察院、台中州廳和台南州廳等等，這寡有名的建築攏是日本建築師森山松之助所設計的，嘛成做台灣重要的文化資產，透過這寡建築物會當跨到另外一个時代的捷徑。森山松之助留佇台灣經典的建築猶有原本的專賣局、交通局遞信部、北投公共溫泉浴場，甚至是台中公園的湖心亭到今攏猶咧使用，伊嘛是替台灣留落來上濟國定古蹟的建築師。
【過年的滋味—菜頭粿】早前得欲過年的時，家家戶戶攏咧炊粿，這馬這款的場景是已經真罕見矣，毋過猶是有業者保留古法來炊粿，欲將記持當中的好滋味繼續流傳落去。佇咧新竹縣峨眉鄉的深山林內，就有用傳統的古法落去炊粿的師傅，𪜶攏是用燃柴來炊菜頭粿；佇咧台北市迪化街二段有一个粿仔街，里長煩惱後一代以後會漸漸仔放袂記得做粿的這段記持，所以將家己的店面改做米食文化館，內底有囥真濟里民送的模仔和老相片，希望逐家毋通將這條粿仔街放袂記得。
1/19 禮拜日暗時七點半，綴台灣記事簿先來熟似台灣建築留經典-森山松之助，落尾才閣來享受過年的滋味—菜頭粿！
了解更多 →