會發電的校園？微電網的防災佮生態考驗、再會 五月雪｜台灣記事簿
【會發電的校園？微電網的防災佮生態考驗】
你敢知影校園嘛會當發電？明志科技大學有一套校園微電網，毋但是厝頂有搭光電板，嘛共太陽能、蓄能系統、電動車的充電柱，閣有能源管理系統整合做一套細型電力系統；遮的蓄能系統會當予一萬兩千支iPhone 16充甲滿。
校園微電網毋是單純的科技展示，微電網和一般光電上大的無仝，就是伊有機會佇災害的時，免靠大電網，家己「孤島運轉」，會當予電動車佮民眾的手機仔充電，嘛會當是學校節能、能源教育和未來電網調度的起點。
【再會 五月雪】
台灣西部海邊，濟濟所在攏有飼蚵仔，毋過一粒一粒肥閣媠的蚵仔背後，煞有沉重的代價。過去用浮棚仔飼蚵仔的蚵農，攏是用pho-lí-lóng浮具，遮的pho-lí-lóng透風落雨曝日了後，會產生塑膠微粒等等的環境汙染，成做海邊仔的「五月雪」。
為著保護自然環境，台南市政府宣布，2026年10月開始欲全面禁止飼蚵仔使用pho-lí-lóng浮具，政府推廣幾若種新型的浮具材質，包括EPP閣有HDPE，毋過EPP材質佮pho-lí-lóng仝款會產生塑膠微粒，HDPE材質價數較懸，嘛有蚵農反映用久會變形佮表面傷滑等等問題。
8/9禮拜暗時七點半，台灣記事簿先𤆬你來看校園欲按怎成做一个細型的電力系統，紲落才來關心pho-lí-lóng浮具造成的環境汙染，閣有後日仔欲按怎改善的難題。
了解更多 →