鹿港腔放送：聲音的文化記憶、少年講冊人 地方囡仔予文化再生｜台灣記事簿
【鹿港腔放送：聲音的文化記憶】
鹿港有久長的發展歷史，嘛有濟濟歷史文化建築；毋過行佇路裡，會當發現鹿港的古厝是愈拆愈濟，鹿港腔台語嘛漸漸仔咧消失。
鹿港腔台語佮這馬的優勢腔誠無仝，除了腔口差、變調方式無仝，嘛有真濟在地特殊的用詞；面對愈來愈罕得聽著的鹿港腔台語，有鹿港在地青年錄Podcast節目、辦行讀活動，向望予鹿港腔台語有閣較濟無仝的可能。
毋管是建築抑是腔口，攏是一个所在真重要的文化記憶，欲按怎保留佮傳承，是當代重要的課題。
【少年講冊人 地方囡仔予文化再生】
佇這馬的台灣，濟濟囡仔已經無像較早有較完整的環境通學講台語，厝內的序大嘛無一定對囡仔講台語。
感受著這款的問題，彰化有學生成立「台語巢」、「頓印仔」等等團體，透過經營社群媒體、創作網路影音等等的方式，嘛辦活動用台語講繪本予囡仔聽、紹介在地文化，希望予少年人閣較親近這个語言，嘛為鄉土傳承注入新的活力。
3/8禮拜暗時七點半，綴台灣記事簿來去鹿港，看這个有四百年歷史的城市，欲按怎保存在地歷史建築佮特色腔口， 紲落才到彰化市，看這陣對母語傳承和地方文化真有理想的少年學生，辦了啥物款的活動咧？
了解更多 →