in的青春 重新翻譯、藍染：共大地借色｜台灣記事簿
【in的青春 重新翻譯】
1973年9月，濟濟高雄加工區的女工，為著全勤獎金200箍相爭坐船，想袂到這隻舢舨仔一開出去無偌久就反船，造成25个女性死亡。
這寡少女，大部份來自漁業為生的中洲，為著予社會毋通袂記得這件悲劇，25个罹難者做伙安葬，號做二十五淑女公墓，無想著漸漸傳出有查某鬼；為著欲改掉in的歹名聲，中山大學的學生辦展覽，希望外界重新認捌in。
【藍染：共大地借色】
台灣傳統工藝藍染，是用天然植物做色料，會當創作出真幼路色水層次。
十九世紀的時，台灣藍染產業內需兼外銷，市草誠好，捌予人叫做「藍金」，但是1940年代了後，藍染產業煞出現斷層。
1990年代，工藝中心開始共復原，重新建立台灣藍染的技藝；今有愈來愈濟少年設計師佮工藝師合作，創作融入現代生活的產品，共藍染這項傳統工藝，染做獨特的台灣感性。
12/14禮拜暗時七點半，台灣記事簿先𤆬你來看高雄女工的故事佮校園內的轉型正義，紲落才來熟似台灣傳統的藍染工藝！
了解更多 →