太平國校仔踅博物館、台南運河99年｜台灣記事簿
【太平國校仔踅博物館】太平國小博物館今年拄開館，內底有百年古物，台灣第一雕刻家黃土水的作品《少女》。《少女》佇臺北市太平國小踮一世紀，落尾佇北師美術館展出了後，閣予人指定做臺北市一級古物，《少女》欲佇佗位保存就成做眾人關注的議題。
黃土水是台灣第一个到日本學習美術的藝術家，也是頭一个入選帝國美術展覽會的台灣藝術家。1895 年出世，1930 年過身，伊才活 35 年，但是伊非常短暫的性命內底真正是發光發熱。黃土水的大理石雕刻作品無濟，除了捌入選日本帝展的《甘露水》，另外就是《少女》。佇彼个年代，伊差不多會當講是代表台灣的台灣之光，鼓勵足濟仝時代的台灣的前輩畫家。
【台南運河99年】佇咧台南這个充滿歷史感的城市當中，有一條流過市內城區，見證時代變遷的水路—台南運河，到今已經有 99 冬。這條運河早前是台灣的經濟動脈，見證百年以來安平的地景變遷佮都市的起落，這馬成做城市的文化行銷上重要的地標。台南的運河毋但是過去商業的大動脈，嘛是連結府城歷史的文化水路佇咧台南運河的沿岸，處處攏會當看著過去痕跡，造船廠、製冰廠 閣有安平海關、安平古堡，行過百年歲月的運河，毋但是一條水路爾爾，閣較是充滿記持，見證時代的變遷，充滿豐富的歷史價值。
8/24禮拜暗時七點半，綴台灣記事簿先做來踅太平國校仔的博物館，落尾才閣來認捌台南運河的99年！
了解更多 →