台語文學出版燒滾滾、芳苑佮風機的距離｜台灣記事簿
【台語文學出版燒滾滾】臺語創作自文學、兒童繪本，市面上百百款的出版作品，毋但豐富臺語文化，最近五冬外來，出版市場的成長也幫助台語的復振。台文出版大葩尾上重要的關鍵是商業化，但準若無往過的政策，若無國家語言出版的補助，可能無法度看著這陣的市草。這幾年，台語文學作品的出版會使講是鬧熱滾滾，欲按怎延續這个熱潮更加發展，需要閣較濟的作家佮謮者，佇咧無仝題材繼續掖種、沃肥，才有法度繼續湠落去。
【芳苑佮風機的距離】台灣408支陸地風車，彰化縣有123支，對當地居民佮環境造成誠大的傷害。漢寶村村長就指出風車才運作幾年，就出現漏油、汙染等等的狀況，廠商攏無來處理。另外，中研院研究報告嘛顯示，風車五百公尺以內住戶心率變異性，低頻噪音增加7.86分貝，心臟自主神經調控功能大大降低。國內目前無對風車設安全距離，毋過若是風車離住戶無到五百公尺，就愛做環評審查。國際間嘛有真濟風車造成的問題討論，德國有區政府因為業者無法度改善風車干擾民眾睏眠，規定暗時十點到隔轉工早起六點就愛停止運作；愛爾蘭的風車開發指南建議，五百公尺範圍內徛家爍影袂當超過一年30點鐘或者是一工30分鐘。
5/11 禮拜日暗時七點半，綴台灣記事簿先來熟似台語文學出版燒滾滾，落尾才閣來了解芳苑佮風機的距離！
了解更多 →