《心所愛的歌》
發布時間: 2023-06-02
｜公視臺語台 拜一暗時十點首播
台語歌好聽閣好唱，予真濟台灣人佮海外華人攏真佮意，而且嘛受著影響。除了歌手的表演以外，打造出這寡歌曲的詞曲作者，除了𪜶的名以外，𪜶拍拚、創作的過程煞攏無人知影。
歲月流轉，這寡成就台語歌的幕後功臣嘛漸漸退出舞台，佇這陣替𪜶留下一寡紀錄，嘛是對𪜶作品的肯定。濟濟台語歌流傳甲久久長長、逐家攏會曉唱，煞毋知影這寡歌曲作詞作曲佮製作人是啥人。
阮的節目以歌曲來介紹人物，用逐家所熟似的歌曲，來喚醒逐家的紀持佮興趣，嘛來紹介這寡台語歌曲榮景的幕後功臣，猶閣有藏佇這寡人物背後感動人心，煞無啥物人知影的性命過程。
