一碗炸醬麵的移民史、我欲綴老母姓｜台灣記事簿
【一碗炸醬麵的移民史】其實佇台灣有蹛真濟韓國的華僑，佇新北市永和就有一條「韓國街」，往過是去買韓國貨的好所在，當奢颺的時陣有上百間店家，大部份攏是由韓國的華僑咧經營。對清朝時代開始，就有山東人來到韓國做生理，因為軍閥時代國共內戰等等的戰事，逃難去到韓國的山東人愈來愈濟，後來成做韓國華僑。毋過因為受著政策限制，𪜶長期攏提袂著韓國的國籍，顛倒是將台灣當做𪜶的「歸屬」，袂少人因為按呢選擇來台灣讀冊，甚至是提著台灣的身份證釘根生湠。
【我欲綴老母姓】對1990年開始，透過婦女團體的拍拚猶閣有大法官宣告「父權優先」的條款違憲，台灣漸漸修正《民法》親屬篇內底各種歧視女性的無平等條文。一直到2007年 立法院才修法，將囝兒「原則綴老爸姓」改做「由爸母約定」，猶毋過紲落來閣出現新的問題。經過長年的抗爭，民法1059條閣再修改，予法院會當為著囡仔的利益宣告，若是囡仔已經成年，𪜶嘛會當家己選擇改姓，毋免閣經過爸母的同意。另外，這改的修法嘛新增加抽鬮仔的制度，來因應囝兒出世的時陣，爸母無約定或者是撨袂平的情形。5/25 禮拜日暗時七點半，綴台灣記事簿先來看這碗炸醬麵的移民史，落尾才閣來了解綴老母姓的議題！
了解更多 →