恆春民謠 相放伴、台灣工藝之父 顏水龍｜台灣記事簿

【恆春民謠 相放伴】

恆春民謠是台灣歌仔誠特色的代表，《思想枝》佇陳達過身了後差一點仔失傳。尾仔地方開始推捒，希望有人繼續唱落去。
自細漢就定定聽陳達唱《思想枝》的陳英阿媽，受著藝師張新傳的鼓勵，開始學月琴，一睏仔就誠熟手。伊四界演唱，落尾嘛成做恆春民謠重要的傳藝師，予文化部認定做人間國寶。
伊今年90歲，和一陣恆春的阿媽誠拍拚欲共工夫傳予後一代，希望恆春的歌謠一直唱落去。

【台灣工藝之父　顏水龍】

9月24是台灣工藝之父顏水龍過身26週年，顏水龍1903年佇台南下營出世，是台灣第一代藝術家。
日本時代和陳澄波、楊三郎、郭柏川、廖繼春等人，相招組一个赤島社。1934年創立臺陽美展，1940年伊閣佇台南學甲創立南亞工藝社，指導民眾用自己種的鹹草，編草蓆佮加薦仔賣去中國佮日本。
顏水龍成立的南投縣工藝研究班，成做這馬的國立台灣工藝中心。
顏水龍毋但是畫家，嘛是工藝美術家、教育家。伊對台灣本土的美術教育佮工藝文化，有誠大的貢獻。