共傳統工藝結合動畫，向國際展現糊紙文化｜《青春！咱的夢》

【奇幻的糊紙世界】

佇台灣欲有做百年的事業真無簡單，尤其是佮死有關係的傳統工藝。糊紙店的第四代接班人張宛瑩佮小弟張徐展，欲共阿祖留落來的手藝，變出無仝的面貌。

宛瑩自細漢生活佇糊紙產業，無感覺這是一个別人看做奇怪的行業，煞佇讀冊捌代誌了後去予同學笑，久來就開始排拆厝裡的工課。伊佇高中、大學讀的攏是科技相關的領域，毋過佇出社會了後，發現對阿祖時代留落來的糊紙技藝，原來是遐爾罕得看。 現實狀況是，市場的需求改變，生理愈來愈䆀，爸母想欲共老店收起來，嘛無希望囡仔來接這个食袂飽的頭路。

毋過人生就是遮爾趣味，外國人看著怹做出來精緻的靈厝，最後竟然是愛燒掉，就邀請𪜶共靈厝𤆬到法國巴黎羅浮宮左翼裝飾藝術美術館展覽；張徐展嘛結合糊紙的技巧，用紙捏出探索性命議題的逐格動畫紙尪仔，逐个作品展現奇異的性命記持，用影像延續百年老店的另外一種生存的可能。

為著欲予閣較濟人了解百年工藝其實就佇咱的生活當中，張宛瑩嘛佮同事詹昱筑行入去校園、深入地方社團，對簡單的鉸紙、做紙尪仔開始，𤆬逐家認捌充滿禁忌的糊紙世界，用一張紙、一支竹仔、一寡糊仔創作出趣味的美學。

糊紙工藝佇消失、重組佮再生當中被理解，轉化型式延續性命。三个少年人用傳統、用創意推廣祖先的手藝，雖然有壓力，嘛捌懷疑過家己，毋過綴著愈來愈濟人對糊紙的理解，也共怹捒對閣較頭前，繼續搬演糊紙精彩的故事。

 公視臺語台《青春！咱的夢》7/22這禮拜六暗時7點半，欲𤆬恁來看糊紙文化無仝的風貌。