::: 中央內容區塊
:::

菁仔欉 剉抑毋剉?、掠袂完的外來客 青杜定 |台灣記事簿

發布時間: 2026-11-20

【菁仔欉 剉抑毋剉?】

農業部2023年到2026年的《菁仔欉廢園轉作作業規範》指出,農民若廢菁仔欉園,而且轉作推薦作物,每公頃上濟補助25萬,統計到6月,成功廢園576公頃,毋過成功轉作只有51公頃,成果無蓋好。

推動十外年的菁仔欉廢園政策,成效猶是真慢;濟濟農民因為欠缺轉作輔導,無願意放棄菁仔欉,除了轉作,嘛有人提檳榔子成做天然染料,予咱看著欲解決菁仔欉的問題,可能不只有共欉剉掉這个答案。

公視台語台
【掠袂完的外來客 青杜定】
 
青杜定對2000年左右開始,因為寵物市場需求進口,落尾一寡青杜定予人棄養,走甲野外生湠,到今總數會使講是無法度估計,以屏東等等南部地區災情上嚴重,毋過欲共青杜定清零,有專家表示咱已經錯過上好的時機。

青杜定對一開始是古錐的動物伴,到今佇野外生湠成做農民的威脅,學者嘛煩惱這寡野生的青杜定可能會帶寄生蟲抑是病菌,致使其他的物種受危害;毋過對抗外來種毋是一工兩工的代誌,向望會當沓沓仔共數量壓制,為台灣的自然環境,爭取閣較濟歇喘的空間。


11/22禮拜暗時七點半,台灣記事簿先𤆬你來看推動十外年的菁仔欉廢園政策,成效是按怎真慢,除了廢園轉作閣有啥物別的可能?紲落才來關心外來種青杜定,是按怎對動物伴成做農民的威脅,對台灣的生態閣造成啥物危害?