薔琵減弱做中颱 19縣市列入陸上警戒範圍
發布時間: 2026-10-22
風颱薔琵已經減弱做中度風颱，氣象署暗頭仔共陸上警戒範圍擴大到臺灣本島19縣市。暴風圈按算明仔日（10/23）早起會共規个臺灣罩牢咧，十級暴風半徑可能掃著宜蘭東北角。颱風中心上接近臺灣的時間點，是明仔日（10/23）深更到後日（10/24）早起，也無排除登陸。北部山區和宜蘭，愛注意大水雨。基隆市早起已經佇海邊仔搝封鎖線，禁止民眾入去。目前已經宣佈停班停課的縣市有嘉義縣、臺南市、高雄市、屏東縣、綠島、蘭嶼，閣有新竹尖石鄉的部分學校。
