台灣民主貴人彭光理、少年阿公𤆬路 行入南北館看見宜蘭｜台灣記事簿

【台灣民主貴人彭光理】

頂禮拜前總統蔡英文展開訪問美國的行程，這嘛是伊卸任了後頭擺訪問美國。翻頭轉去看十一冬前，2015年蔡英文成做台灣頭一位行入美國國務院的總統參選人，這幕後的功臣，就是為台灣佮美國走傱20冬的Michael Fonte(彭光理)。

前民進黨駐美代表處的主任Mike Fonte，1967年對神學院畢業來到台灣傳教，和台灣的緣分自按呢牽做伙；後來伊佇美國熟似著彭明敏，了解真濟台灣人當咧為民主自由來奮鬥，1986年民進黨成立了後，Mike佮台灣公共事務會(FAPA)佇咧美國華府積極為台灣出聲，Mike嘛成做台灣佮美國之間重要的一板橋。

【少年阿公𤆬路 行入南北館看見宜蘭】

「文化就是咱的生活。」——少年阿公 方子維 
宜蘭南北館市場毋但有草仔粿佮百年春餅皮，連嫁娶「糕仔封」佮喪事「文頭粿」攏有，共在地人的一世人總包在內。

方子維是佇菜市仔內底大漢的囡仔，高中畢業了後去外縣市讀冊，嘛捌去澳洲、日本食頭路，落尾選擇轉來故鄉宜蘭，做一个「少年阿公」；伊煩惱踅菜市仔的人愈來愈少，細漢時的記憶會消失去，所以決定欲轉來故鄉拍拚，𤆬人對南北館市場熟似宜蘭。

10/18禮拜暗時七點半，台灣記事簿先𤆬你來看前民進黨駐美代表處的主任Mike Fonte(彭光理)佮台灣之間的故事，紲落才綴回鄉少年人的跤步來踅菜市仔，看in按怎用熱情共古早時代耍出新花樣。