大馬學生是按怎無欲來台讀冊、不只是一杯咖啡｜台灣記事簿

【大馬學生是按怎無欲來台讀冊】

濟濟馬來西亞華人高中畢業會選擇出國讀冊，往過海外留學的地點攏是以台灣為主，毋過最近十冬內，來台灣留學的人數是直直減少。

長期以來馬來西亞攏是台灣主要的外籍學生來源國，毋過這兩冬，來自馬來西亞的學生，煞是已經無到一萬人；目今面對全世界大學相爭咧搶人才，台灣的高等教育，需要揣出家己的優勢佮特色，才重新共跤步徛予在。

【不只是一杯咖啡】

咖啡果有幾若層的結構，上內底才是種子，也就是咖啡豆仔，咖啡豆仔干焦佔咖啡果無夠20%的重量，大部份果皮、果肉這寡部位，若毋是做堆肥，就是佇處理過程予人擲掉。

到利便店買咖啡嘛是真濟人的日常，毋過大量生產咖啡了後的咖啡粕，煞是予人頭殼疼的問題；資源循環署成立一个「植物性渣類管理平台」，希望透過串聯無仝的企業，共咖啡粕回收再利用，嘛有國內的紡織廠商開發咖啡紗，共廢棄物變做新的資源。

7/1９禮拜暗時七點半，台灣記事簿𤆬你來看是按怎馬來西亞的華人學生愈來愈無想欲來台灣讀冊，紲落來才看已經成做逐家日常生活一部分的咖啡，咖啡豆仔是按怎生產，咖啡粕閣會當按怎再利用。