失落的派娜娜、轉譯高菊花｜台灣記事簿

【失落的派娜娜】

佇1950年代，Panana是台灣真出名的歌手，伊的漢名號做「高菊花」，伊的阿爸是白色恐怖受難者，前吳鳳鄉(今阿里山鄉)鄉長，高一生(Uyongu Yata'uyungana)。Pananaa(派娜娜)的犧牲佮艱苦，是咱袂得想像；伊的青春佮夢想，嘛佇阿爸高一生(Uyongu Yata'uyungana)予人掠去了後，就擋恬矣。

成做「Panana(派娜娜)」的歌手人生看著奢颺，對伊來講煞是滿滿袂勘得的痛苦，也埋一个一世人講袂出喙的秘密。

伊是按怎會去唱歌？伊的人生閣因為伊的身分按怎受折磨？這禮拜的台灣記事簿，𤆬你來看伊的故事。

【轉譯高菊花】

Panana(派娜娜)佇台頂唱歌，台仔跤煞是警備總部的人咧等伊，欲𤆬伊去問話，甚至予人要求愛「服務」彼當陣的波蘭船員，厝內人嘛受情治人員的監控。

Panana(派娜娜)一生的故事，有少年大學生佇校園用家己的方式講予逐家聽，嘛有導演共拍做紀錄片，攏是向望會當予閣較濟人知影這段沉重的歷史，避免仝款的錯誤閣再發生。

6/7禮拜暗時七點半，台灣記事簿先𤆬你熟似Panana的人生故事，紲落才看現代各領域的人，按怎透過家己的方式共逐家講這段歷史。