台灣米拚上國際路、百年菊藝牽台日情｜台灣記事簿

【台灣米拚上國際路】

日本2023年出現欠米、米起價的「米荒」，致使台灣米有閣較濟機會入去日本市場；實際上，台南11號對2010年開始穩定外銷日本，2025年，桃園新屋的有機米，嘛頭一改外銷去Oo-khí-ná-uah的有機農產商店。

台灣米若欲入去日本市場，對農藥使用、殘留檢驗到契作制度，逐關著愛照日本的標準，收冬了後，嘛愛保領逐批米的水分、整粒率佮食味值符合出口的標準，毋過台灣是小農為主，雖然品質有到標準，生產量煞猶源是真大的挑戰。

【百年菊藝牽台日情】

笠間菊花節，已經舉辦118改，是日本歷史上久的菊花祭典；對2019年開始，笠間市佮台北用菊花展開交流；日本茨城縣笠間市佮台北士林官邸，一爿是百冬歷史的菊花祭，一爿是有歷史記持的城市花展，利用花藝佮展覽對話，毋但分享栽培的技術，嘛予兩座城市用菊花傳達文化。

5/17禮拜暗時七點半，台灣記事簿𤆬你來看台灣米欲入去日本 ，甚至國際市場的挑戰，紲落才去日本的笠間菊花節，看菊花是按怎予茨城縣、台北兩座城市來交流。