兩蔣軍事地景 劍潭山歷史記持、鹽一市場閣再活起來｜台灣記事簿

【兩蔣軍事地景 劍潭山歷史記持】

蔣介石、蔣經國爸仔囝威權統治台灣四十冬，in佇台北的劍潭山頂一人徛一爿，南爿是蔣經國所蹛的七海官邸，北爿是蔣介石所蹛的士林官邸；1980年代尾期，台灣開始行向民主化，毋過這馬佇劍潭山，猶會當看著真濟威權時代所留落來軍事遺跡。

今佇劍潭山附近有一陣關心人權、歷史的老師佮學生，透過舉辦展覽佮行讀，𤆬逐家重新思考過去，共同行向未來。

【鹽一市場閣再活起來】
鹽埕過去是高雄上繁華的所在，毋過遮的繁榮，落尾因為市中心轉變漸漸衰頹，有超過七十年歷史的鹽一市場，經過鬧熱到落坐，市場內底的擔仔嘛愈來愈少，甚至傳出欲予人拆掉。
回鄉的在地青年，毋甘這个儉濟濟囡仔時回憶佮感情的所在無去，一陣少年人拍拚共市場留落來，除了保留傳統，嘛結合藝術創作，予伊有全新的性命。

4/26禮拜暗時七點半，台灣記事簿先𤆬你去劍潭山看遐的軍事遺跡，紲落才去高雄的鹽一市場，看這个重新閣活起來的老市場。