馬來西亞庇能 欲共福建話揣轉來、台灣音樂的DNA 相褒歌｜台灣記事簿

【馬來西亞庇能 欲共福建話揣轉來】

佇馬來西亞的檳城，毌管是路裡的kha̋ng-páng抑是路名，攏會當看著福建話的痕跡；毋過這馬慣勢用福建話開講佮溝通的少年人是愈來愈少，學校教育嘛以華語為主。

看著庇能（檳城）福建話漸漸落坐，2014年一陣大馬的青年成立「庇能福建話協會」，in去拜訪馬來西亞、 新加坡等等東南亞的國家，共民眾開講的畫面錄起來，才閣用文字來記錄。福建話的推廣，毋但是保留講母語的能力，嘛是共文化繼續慱落去。

【台灣音樂的DNA 相褒歌】

相褒歌源自早期台灣北部山區挽茶時的即興對唱，形式一般是七个字一句的四句聯，任何生活的大細事、男女情愛，攏會當唱做相褒歌。為著欲保存這項傳統藝術，有人採集出冊，有人共相褒歌樂譜化，嘛有相褒歌保存者開班教學生，向望有閣較濟人認捌相褒歌文化。

這馬嘛有真濟少年一輩的相褒歌學生，用家己的專長結合相褒歌，應用佇無仝的文化抑是教育層面，就是欲予相褒歌會當繼續唱落去。

3/1禮拜暗時七點半，台灣記事簿先𤆬你去馬來西亞的檳城，看庇能福建話今馬的使用狀況，紲落才倒轉來看台灣的傳統藝術──相褒歌，閣是欲按怎共保存佮傳承？