百貨氣爆啟示錄、一粒卵的選擇｜台灣記事簿

【百貨氣爆啟示錄】

2025年2月，台中新光三越可能因為施工引發氣體爆炸，造成五个人死亡；事後發現，新光三越違反真濟規定，包括事先無申請室內裝修許可，也無制定施工的防護計畫。

氣爆發生七個月了後，台中新光三越佇2025年9月底恢復營業，人客仝款是滇滇滇。經過這改的爆炸意外，各界開始檢討百貨公司的公共安全，嘛向望業者會當閣較加重視工程安全，予工作人員和消費者，有一个閣較安全、安心的環境。

【一粒卵的選擇】

2025年底，台灣一批雞卵驗出芬普尼代謝物含量超標，根據台灣動物社會的研究會統計，台灣一年消費超過80億粒雞卵，其中有倚7成來自格仔籠飼的卵雞，雞仔佇格仔籠這款無健康的環境，可能有寄生蟲、病害等等的問題，致使雞農著愛使用藥仔，才會有這款問題。

台灣這馬動物福利的意識提升，放牧、平飼這款友善飼養嘛愈來愈濟，毌過相對較懸的成本和價數，消費者佮雞農，會按怎選擇？

1/25禮拜暗時七點半，台灣記事簿先𤆬你來看台中新光三越氣爆到底是按怎會發生，有啥物會當檢討佮改進的所在？紲落才來看傳統籠仔飼雞佮友善飼養對雞仔、雞農、消費者來講有啥物精差？