用潘飼豬行入歷史、LINE：看袂著的阻礙｜台灣記事簿

【用潘飼豬行入歷史】

2025年10月，台灣爆發頭一例非洲豬災，經過15工禁止運送佮禁刣，共疫情控制落來。

行政院嘛決定自2027年開始，全面禁止用潘飼豬，引起無仝聲音的討論，有農民認同台灣無應該閣用潘飼豬，毋過嘛有農民是誠反對。

全台灣一日的潘有2115噸，若是繼續用潘飼豬，佇咧真僫確保照規定燃潘的情形之下，就猶原會有風險，毋過若是禁止，咱處理潘的量能敢接載會牢？後一步欲按怎處理佮規劃，種種的考驗才當欲開始。

【LINE：看袂著的阻礙】

LINE是台灣上主流的通訊工具，嘛是真濟人鬥做工課的工具。

視障人士因為需要使用螢幕報讀軟體，大部分攏使用LINE Google Chrome網頁版
，2025年8月，LINE宣布欲結束網頁版本的服務，這个消息對需要佇電腦使用LINE來處理工課的視障者來講，是真衝擊。

若是其他人會當輕鬆佇電腦頂懸使用，視障人士煞無法度的時陣，這種數位落差就有可能致使in邊緣化；台灣數位無障礙的推動，嘛值得逐家做伙來關心。

1/18禮拜暗時七點半，台灣記事簿先𤆬你來看行政院宣布2027全面禁止用潘飼豬了後，豬農無仝的聲音，紲落才來關心若是LINE網頁版服務結束，會對視障使用者造成啥物款的影響？