「鳳凰風颱」台語按怎讀？ 腔調變化成做大話題

若講著「鳳凰風颱」這四个字，毋知觀眾朋友是按怎講的咧？這陣咧網路討論甲真鬧熱，真濟人攏來講台語、盤喙錦。有台語老師指出，台語的聲調變化真趣味，咱有第一優勢腔偏漳的講法Hòng hōng hōng thai(聲調3771)，和第二優勢腔偏泉的講法Hòng hòng hōng thai(聲調3371)。台語老師嘛指出，大部份的人可能較袂去意識著台語的變調，嘛是因為真濟人往過攏毋捌像華語，咧學校有系統性的學習課程。

有網友剪接無仝電視台按怎用台語講「鳳凰風颱」這四字，社群平台嘛討論甲真鬧熱，甚至閣發展出難度級數閣較懸的語句，真濟人攏來講台語練喙花。

「防洪系統的防護效果，予鳳凰風颱的風雨妨害。」

干焦「鳳凰風颱」這四字，佇咧網路頂有無仝讀法，根據台語聲調來看有三種，第一種有講「鳳凰（hông）」風颱的，第二種有人講「鳳凰（ hōng）」風颱，第三種也有人講「鳳凰（hòng ）」風颱，台語台記者嘛實際招民眾做伙來試看覓。

民眾 杞小姐：「（你會按怎讀？）鳳凰風颱。」

陳同學：「這是鳳凰風颱，防洪系統的防護效果，予鳳凰風颱的風雨妨害。」

楊同學：「鳳凰風颱。（抑若第二張咧？）我無法度。」

其實和華語四个聲調比起來，台語聲調加真豐富，以主流腔來講包括入聲在內實際上有7个調。有台語老師指出，台語誠特別的其實就是聲調變化，一个詞干焦最後一字讀本調，其他攏會照規則變調。所以鳳凰的凰一定愛變調。像鳳凰風颱，就有第一優勢腔偏漳的講法Hòng hōng hōng thai（聲調3-7-7-1），和第二優勢腔偏泉的講法Hòng hòng hōng thai（聲調3-3-7-1）。

台語老師 吳玉祥：「就是講名詞的上尾一字無變調，頭前彼幾字攏變調。若是鳳凰風颱這四字咱無變調，來講是唸做Hōng hông hong thai；若是變調了後，臺北（偏泉腔）就變做Hòng hòng hōng thai，南部（偏漳腔）就變做Hòng hōng hōng thai。」

台語老師指出，大部份的人可能較袂去意識著台語的變調，嘛是因為真濟人往過攏毋捌像華語，咧學校有系統性的學習課程。毋過本成就會講台語的民眾，其實平常時講話就會自然變化囉，猶若對頭改學台語的人來講，因為聲調真濟，閣愛學變調有影是較有挑戰性。

記者 呂尚儒 莊浚佑 臺北報導