花蓮崩山湖閣溢出來？ 證實是水利署咧引溪水
發布時間: 2025-09-28
今仔日(9/28)猶原真濟人，聚集佇咧花蓮光復鄉災區，欲來整理環境。
毋過倚晝的時陣煞傳出若像崩山湖又閣溢出來的消息，引起逐家驚惶，大陣救災的民眾攏趕緊欲撤離，就驚又閣做大水走袂赴。
猶毋過經過證實，這是水利署第九河川分署咧引溪水，並毋是崩山湖閣溢流，林保署也繼續咧監控馬太鞍溪，目前並無危險狀況，請逐家毋通生狂驚惶。
也提醒逐家，因為這崩山湖猶是維持紅色警戒，呼籲佇咧災區的民眾著愛隨時保持警覺，萬不一真正聽著霆五秒停五秒，攏總重複九擺的海掃警報聲，請保持冷靜、趕緊撤離避難。
