為苑裡掀起一陣風、美麗島事件與艾琳達｜台灣記事簿

【為苑裡掀起一陣風】

39歲的劉育育佇苑裡大漢，一直到讀大學才離開家鄉。想袂到佇十二冬前，因為反對起風車的抗爭予伊轉來到故鄉。彼个時陣閣有一个佇台北大漢，讀台大法律系畢業的高材生林秀芃嘛加入這場運動，經過兩年的時間，運動結束了後，𪜶兩个並無離開，顛倒是留落來成立「苑裡掀海風」，將苑裡特別的文化推廣出去。嘛佇2018年開苑裡第一間獨立冊店，號做「掀冊店」。
2018年9月，苑裡市場發生火災，將近三百坪的面積攏燒了了，毋過一直攏等袂著新起的市場，2022年劉育育就徛出來，挑戰彼當陣欲爭取連任的鎮長劉秋東，落尾政治素人劉育育當選鎮長。
對體制外行到體制內，對劉育育來講，伊猶是行佇咧社會運動這條路，雖然毋是蓋順遂，毋過已經佇咧苑裡掀起一陣無仝款的風。

【美麗島事件與艾琳達】

1979年12月初十發生的高雄美麗島事件，是台灣民主運動歷史上的大代誌，濟濟黨外人士攏予人掠去，彼當陣有真濟外國朋友來鬥相救援遮的政治犯，艾琳達就是其中一位。
艾琳達的老爸是美國陸軍的後勤軍官，琳達14歲的時陣，老爸予人派到台灣，伊嘛綴咧來到台灣讀高中，從此佮台灣結一世人的緣份。
1978年 黨外人士成立全國助選團，彼當陣傳出風聲講欲掠施明德，擔任助選團英文祕書的艾琳達佮施明德趕狂去到美國領事館辦理結婚的登記，美麗島事件發生了後，警備總司令部發動大規模的逮捕，施明德逃亡26工了後猶是予人掠著，伊的牽手艾琳達嘛予人趕出境。艾琳達佇咧1990年予人解除烏名單，才會當轉來到台灣，佇台灣做研究猶閣有教冊；2006年，因為伊對咱國有特殊的貢獻，內政部發予伊永久的居留證。

這馬，艾琳達的頭毛已經全全白，猶原是真關心人權猶閣有民主的議題，伊𤆬領學生走訪歷史事件現場，將民主運動交棒予後一代。

9/14禮拜日暗時七點半，先綴台灣記事簿的跤步行入苑裡，看少年鎮長是按怎決定轉去故鄉拍拼，紲落來才來看佇美國出世，煞佇台灣民主運動扮演重要角色的人權運動家──艾琳達的故事！