第一間農民診所佇池上、早產兒照護 袂輸生命奇蹟｜台灣記事簿

【第一間農民診所佇池上】
台灣頭一間以農村醫療為目標的診所佇咧台東的池上，「好診所」是為農民打造的復健型診所，伊離池上火車頭干焦兩百公尺，對農民佮一般的民眾來講是近閣好揣，啊若對花蓮台東佮台南來支援的醫師，火車坐到池上，出來了後，行路兩分鐘就會到位，誠利便！
池上「好診所」毋但為農村的醫療迒出重要的一步，嘛是一間由專業醫療團隊、地方的有心人士佮行政單位合作做伙成立的農民診所。未來會由在宅醫療直接行入去農民的厝裡來照顧農民，為農村醫療的照護揣出新的可能！

【早產兒照護 袂輸生命奇蹟】
新生兒的人數逐年咧減少，其中閣有一寡「早產紅嬰仔」需要關心，這馬的少年爸母，毋但囝生較少，而且嘛較慢生，相對來講增加早產發生的機會。根據衛福部國民健康署上新的統計，早產兒的人數逐冬咧攑懸，達到新生兒總數的10.9%。
台灣的醫療技術高明，毋過面對早產率攑懸佮少子化的壓力，對預防到治療，才閣到後續的照護，需要建立閣較全面的系統。早產兒對出世到大漢，醫療設備、育囝津貼、早療教育到健康計畫，逐个坎站攏需要外界資源來鬥相共，才有法度予每一个早產嬰仔攏會當好好仔大漢。

7/27 禮拜日暗時七點半，綴台灣記事簿先做來伙熟似佇池上的台灣第一間農民診所，落尾才閣來了解袂輸生命奇蹟的早產兒照護！