老人公寓做伙揣心適、嘉義的老醫生館｜台灣記事簿

【老人公寓做伙揣心適】
你敢有想過食老以後欲過啥物款的生活？唱歌、跳舞或者是種菜？來到老人公寓，你少年時無好好仔栽培的才藝，想欲去做的夢想，攏有可能佇遮實現！
台灣的老人福利法佇1980年制定，嘛佇1990年提出獎助建立老人公寓，改善老人居住實施計畫，彼个時陣嘛鼓勵縣市政府專案興建適合老人的住宅。
佇咧台灣，老大人比例愈來愈懸的趨勢，欲按怎予每一个老大人蹛佇上蓋適合家己的空間佮住宅，揣著家己上歡喜的生活方式，這个議題愈來愈重要。2007年政府核定長照1.0計畫，2116年閣核定長照2.0，台灣的長期照顧體系嘛是愈來愈完整。

【嘉義的老醫生館】
嘉義市的醫療資源密度真懸，包括醫生館、藥局佮漢藥房等等，佇咧過去病院佮人口比例干焦排佇咧台北後壁。嘉義人對西方醫學的接受度懸，其中一个原因佮日本時代對公共衛生的需求有關係。1899年成立的臺灣總督府醫學校培養台灣醫師，而且斯當時有愈來愈濟台灣人去日本讀醫科，所以嘉義對1910年彼當陣干焦4間醫生館，到日本時代尾期已經有71間矣。
彼當陣的醫生除了共人看病，嘛有袂少醫師參與社會的公共事務，親像政治佮社會慈善事業，猶閣有詩社等等的社團。尤其嘉義市佇咧台灣二二八事件的時陣，彼當陣情形是真悽慘，斯當時政府的支援軍去到嘉義，和平談判的代表陳澄波、潘木枝醫師等人攏去予人銃決。

6/22 禮拜日暗時七點半，綴台灣記事簿先做來伙參觀老人公寓揣心適，落尾才閣來認捌嘉義的老醫生館！