高中校園的轉型正義課、早產紅嬰仔的醫生媽媽｜台灣記事簿

【高中校園的轉型正義課】
目前加入教育部轉型正義課程推動的高中無濟，學校內底有報名相關課程的學生比例嘛無懸，毋過上過課的高中學生講，了解這寡歷史對徛佇這塊土地的每一个人攏真重要，逐家嘛毋通想講，學生會因為看著這寡歷史產生仇恨的想法。
二戰結束，國民政府來台灣了後，發生二二八事件，袂少少年人受社會主義吸引加入共產黨，參加組織的鐵路工人因為牽連省工委會案予情治單位追捕。老師認為轉型正義是真重要的過程，這馬的青少年愈知影過去發生啥物，就會愈了解守護民主的重要。

【早產紅嬰仔的醫生媽媽】
國民健康署出世通報的上新統計，2023年新生兒的人數是13萬5千外人，佇這內底大約有1萬3千个早產兒，差不多占十分之一，而且比例閣有升懸的趨勢。
照顧早產兒46冬的許瓊心醫師是台灣新生兒醫學的先鋒，嘛是濟濟早產兒的「醫生媽媽」，伊規年迵天攏無停歇，就連過年時仔嘛來到病院看嬰仔，嘛為著早產兒的醫療四界走傱請願，為早產兒家庭帶來溫暖的奇蹟。

6/8 禮拜日暗時七點半，綴台灣記事簿先來上高中校園的轉型正義課，落尾才閣來熟似這位早產紅嬰仔的醫生媽媽！