台灣捌是玉石王國、重現 關仔嶺石灰｜台灣記事簿

【台灣捌是玉石王國】
1975年台灣玉的產量占全世界產量的九成，毋過玉仔予在地誠奢颺的日子並無真久長，因為斯當時開採無控制，加上1980年代石油的危機，經濟嘛無景氣，猶閣有對西伯利亞佮加拿大的玉仔來搶生理，所以誠濟玉仔的加工廠攏收收起來，抑若賰的是拍拚拚轉型。

經過外銷沖沖滾的台灣玉，雖然漸漸稀微佮轉型，毋過這塊玉仔是串連咱台灣近代的礦業佮工藝，猶閣有四千年原住民南島文化歷史的見證，是值得咱好好仔保惜的台灣玉。

【重現 關仔嶺石灰】
自1991年開始政府禁止採礦，關仔嶺的石灰業沓沓仔落坐，這馬大部份的石灰原料攏是對外地進口，但是留落來的工寮、石灰窯和傳統窯，專家認為講這是足珍貴的有形的文化資產。若假使無講予咱後代人知，逐家車開過，在來嘛無人去看講這个石灰產業。
當初佇仙草埔這个所在，兩千外人投入這个產業呢，為著欲予逐家共這段歷史記牢咧，店仔口文教協會佇石灰工廠外口做一个石灰窯的裝置藝術，希望民眾會當知影著關仔嶺過去一段輝煌的歷史。

3/30 禮拜日暗時七點半，綴台灣記事簿先來熟似捌是玉石王國的台灣傳統產業狀況，落尾才閣來了解關仔嶺石灰的重現故事！