:::

搶救鹿港100間古厝、嘉義老厝見證木都後一个世代｜台灣記事簿

發布時間: 2025-03-16

【搶救鹿港100間古厝】
見證鹿港發展的歷史，將近五千間的老厝，面對時代的變化，煞是搪著拆除的危機，或者是拋荒的命運，毋過有一个人轉去到故鄉，發心欲來救一百間的老厝！
許書基為著鹿港的老厝付出遮爾濟心力，就是希望會當透過遮的建築記錄台灣袂當放袂記得的移民故事。因為這款的初心，伊開始修復一間閣一間的老厝，修復的費用會當透過租金來交換，許書基也利用遮的老厝來推廣在地的文化，向望予遮的老厝會當揣著新的出路。

公視台語台
【嘉義老厝見證木都後一个世代】
最近這幾冬嘉義老厝的活化再利用，又閣重現出木都的活力，舊柴厝翻身顛倒帶動新起的建築嘛加入柴的元素，經過數十年的演變，老厝結合新素材新活水，予人期待會當見證木都後一百年世代。
人咧講嘉義有兩粒山，第一粒就是逐家攏知影的阿里山，第二粒就是嘉義市幾若千間的柴厝共同形成的這柴厝山。佇嘉義有足濟機會去接觸著柴厝，你會感覺著其實柴頭的物件佮你的生活是會使融合，嘛是足倚近的，你嘛會使對頂懸看著歷史的痕跡。