民主頭一擺 大罷免、被噤聲的台灣文學｜台灣記事簿

【民主頭一擺 大罷免】
台灣最近發生一場全國性的大罷免行動，合計有 31 个區域的選民要求罷免𪜶的區域立委。過去因為罷免的條件真嚴格，所以台灣的選民動用罷免權是真罕見，抑若這改因為國會直直亂袂煞，引發全台灣大罷免行動，無論落尾敢有成功，這攏是為台灣的民主創造新的歷史。
罷免制度總共分做三个階段，頭一个坎站就是欲收集選區內底占選舉人數 1%的提議書；第二个階段就是愛佇咧六十工以內，提著超過 10%選舉人的連署書；落尾就是投票，同意的票數愛超過 25%，才會當罷免成功。

【被噤聲的台灣文學】
欲佇戒嚴的時代出冊無遐爾簡單，毋但愛通過一關閣一關的審查，而且一下無細膩去踏著紅線，閣會無命！毋過想欲看的人是無咧驚，顛倒是想空想縫，就是欲變幾本仔禁冊來看覓。
其實佇戒嚴時期，若準作者或者是翻譯者人佇中國，𪜶的冊就袂使出版，所以有一寡出版社就會幫改𪜶號假名。行過戒嚴時代台灣人才會當體會，有這份言論自由是偌仔爾無簡單，前人寫的冊予人用生命保留落來，嘛是想欲提醒後代人，千萬毋通閣行倒頭路。
3/2 禮拜日暗時七點半，綴台灣記事簿先來看台灣民主頭一擺的大罷免行動，落尾才閣來回顧被噤聲的台灣文學！