無聲的本土語—臺灣手語、阮毋是抾捔的囡仔｜台灣記事簿

【無聲的本土語—臺灣手語】
臺灣手語這陣已經是國家語言，毋過對友善使用手語環境到教育現況和未來人才培育等問題攏需要政府認真看待。針對手語師資不足的問題，教育部表示會擴大培訓對象，也會將啟聰學校教師納入培訓對象。
手語為啥物叫做臺灣手語，是因為原本伊是對日本來的，猶毋過日本人教予台灣人的時陣，尾仔就變做台灣家己的，這馬臺灣手語佮日本手語比起來，差不多賰無到20%是相仝的。

【阮毋是抾捔的囡仔】
人咧講彼歹路毋通行，但是你無想過，有的囡仔伊可能干焦伊眼前這條路通好選爾。佇咧逆風劇團創辦人18、19歲的時陣，發現演戲會當協助佮𪜶仝款茫茫渺渺的少年家，所以創辦逆風劇團。透過逆風劇團的陪伴，予遮的少年家必巡的人生閣再照著光，予每一个囡仔攏會當揣著屬於家己的位置。
逆風劇團招一陣厝內底可能無幸福揣袂著方向，將失學失業的人招做伙，排練逆風劇團的故事，上尾這陣囡仔𪜶攏會當徛起去舞台頂，謝幕的時陣，身軀頂的標籤就剺落來矣，證明家己毋是歹學生。戲齣演煞毋是結束，是另外一个開始！

2/16 禮拜日暗時七點半，綴台灣記事簿先來關心無聲的本土語—臺灣手語，落尾才閣來了解這陣毋是抾捔囡仔的故事！