:::

閃爍台灣膠彩百年風景、礦塗染的藝術｜台灣記事簿

發布時間: 2025-01-20

【閃爍台灣膠彩百年風景】
「膠彩畫」自日本時代傳來台灣，當當時是號做「東洋畫」，是台灣膠彩畫之父林之助重新替伊定名；「膠彩」是一款特殊的創作媒材，伊是用礦石去磨做的色料，而且每一種礦石攏有無仝的閃光，按呢的材料特色就會影響藝術家的畫面表現。
台灣膠彩畫發展重要的時間點和政治變化誠密切，膠彩畫佇日本時代傳來台灣，1946年國民政府來台了後，發生水墨、膠彩正統國畫之爭；1972年台日斷交，後續膠彩畫失去官方展出的空間，為著避免藝術絞入去國家族群的爭議，林之助才提出這膠彩畫的定名，成功共膠彩畫這項百年藝術傳承到今。

公視台語台
【礦塗染的藝術】
礦物塗染這項過去捌中斷的古早技藝，隨科技進步克服技術重新復振，新一代的藝術家用家己的方式重新將人和土地牽做伙。
其實古代就有礦物染、礦泥染按呢的操作，毋過伊其實無啥會當予人流傳落來，藝術家認為誠大的原因是因為無法度共當地的塗搬來搬去，而且礦物塗染是天然染色，落色的速度也比化學染較緊，毋過嘛有藝術家認為這是優點，因為按呢就會當閣染無仝的色水，共舊衫變做一領新衫。