siat-tooh的滋味：男士理髮廳、台灣捌有一條韓國巷｜台灣記事簿

【siat-tooh的滋味：男士理髮廳】
綴時代的變化，傳統的理髮廳是一間仔一間收起來，毋過老師傅一粒一的手藝，𠢕人對專業的堅持，猶閣有人佮人之間溫暖的感情猶是予真濟人感覺真數念。
這馬的人真僫想像較早的理髮廳會開到三更半暝，有的人客剃頭閣著愛看時辰的，為著趁錢，剃頭師的喙齒根咬咧嘛著順人客的意；不而過這馬的生理和較早來比是差真濟，因為師傅年歲有矣，有的嘛退休，或者是厝主欲共厝賣掉，理髮廳一間仔一間自按呢收起來。

【台灣捌有一條韓國巷】
韓國人來到台灣大概是對20年代開始，𪜶大部份攏蹛佇咧基隆的勝利巷，遮嘛予在地人號做是韓僑街。早期佇咧台灣的韓國人慣勢互相通婚，就算𪜶的囝兒序細佇咧台灣大漢，韓國話猶是lù-lù叫。
佇咧台灣的韓國人經過日本殖民、戰敗和冷戰，甚至後來台灣佮韓國斷交，這馬遮猶閣留佇台灣的韓國人嘛成做台灣多元族陣的一份子。

1/26 禮拜日暗時七點半，綴台灣記事簿先來體驗siat-tooh的滋味：男士理髮廳，落尾才閣來熟似台灣捌有一條韓國巷！