佇金山造浪的少年人、中學母語課沐沐泅｜台灣記事簿

【佇金山造浪的少年人】
十月初的山陀兒風颱帶來大雨造成新北市金山區嚴重淹水，好佳哉一陣少年人來鬥相共重建家園，𪜶就是「浪金山」。
「浪金山」嘛是一間在地人開的金山餐酒館，不三時嘛有地方創生的工作者佇遮開會，向望為金山開創一个新時代！透過藝術、交流會、做公益、社區參與等等，予一陣原本完全無熟似的人變作敢若厝內底的人，遐爾親密、熱情就是為著金山的未來設想。

【中學母語課沐沐泅】
《國家語言發展法》佇107年12月立法成功，漸漸仔有一寡少年學生仔開始想欲學家己的本土語言，毋過台灣教本土語言的師資實在蓋少，欲揣到適合的老師真正無簡單，學者嘛批評，政策配套明顯不足，師資制度保障無夠、勞動條件無夠好，老師教學的熱情一直消磨落去，恐驚母語教育的路會愈來愈歹行。

12/8 禮拜日暗時七點半，綴台灣記事簿先來熟似這陣佇金山造浪的少年人，落尾才閣來了解沐沐泅的中學母語課！