八米路限制的巷仔文化、礦塗染的藝術｜台灣記事簿

【八米路限制的巷仔文化】
佇咧台北中山捷運站附近有徛三間百貨公司的中山商圈，是英國Time out雜誌講的全球上奅的四十大街區，自從今年四月開始有74間店家受著檢舉，多數攏是因為相接的路無到八公尺闊，違規的店家若袂當改變經營的項目就干焦會當關門，有的咖啡店就真正離開這个商圈。遮的店家的後一步到底是欲按怎才好？
佇咧台灣這塊土地，住商混合是長久以來的生活模式，難免會有衝突會有冤家，假使講咱將遮的經驗佮教示變做轉機，就有可能會當創造出住宅佮店家雙贏的機會。

【礦塗染的藝術】
有一陣為著台灣無家己的色彩感覺真奇怪的藝術家，做伙走出來將故鄉礦物塗做成染料，染佇咧纖維頂頭、用來畫出美麗的景色辦展覽，透過作品分享對土地的熱愛。
新一代的藝術家想欲用家己的方式重新將人和土地牽做伙，𪜶用礦物塗染這項過去捌中斷的古早技藝，隨科技進步克服技術、重新復振，欲用礦塗染來記憶咱台灣的色水。

11/10 禮拜日暗時七點半，綴台灣記事簿先來了解八米路限制的巷仔文化，落尾才閣來欣賞礦塗染的藝術！