散食人的艱苦、新時代布袋戲｜台灣記事簿

【散食人的艱苦】
佇台灣欲做一个散赤人毋是真簡單，就算你生活困難，嘛無一定提會著補助，佇台北市的街友大概5%的人才有提著補助。《社會救助法》規定，超過16歲未滿65歲者若無特殊狀況就會予認定有工作能力，若查無收入也提袂出證明，政府就會核算基本工資，有這个無存在的基本工資就會請袂著社會救助。
《社會救助法》是協助經濟弱勢重要的制度，但這部1980年制定的法律經過濟改修法，上重要的觀念猶是無改變，誠濟人猶原被排除在外，這張弱勢者經濟的安全網毋知當時才會補起來？

【新時代布袋戲】
少年輩藝師挑戰自我，共傳統技藝加上現代頭腦，拍開傳統戲台彩樓的創新試驗，佇現代劇場、烏盒仔內底搬布袋戲，走揣布袋戲的可能性。
布袋戲團隊想欲結合現代科技設計出一款會當看著多元世界的效果，無實體的戲台，伊的空間變化就靠燈光來調度，嘛因為無戲台擋佇咧演師和觀眾之間，演師現身予觀眾看現現，閣共觀眾的身軀當做是山、樹仔抑是路，尪仔佇觀眾之間飛來飛去，予觀眾做伙參與這齣戲的演出，成做戲的一部份。

11/3 禮拜日暗時七點半，綴台灣記事簿先來了解散食人的艱苦，落尾才閣來欣賞新時代的布袋戲！