蔡瑞月舞蹈的延續、火燒島政治犯醫療團｜台灣記事簿
發布時間: 2024-10-23
【蔡瑞月舞蹈的延續】
2024年4月蔡瑞月文化基金會召開一場記者會，訴求是台北市政府應該改用文資法第21條第4項以合作模式取代外包經營，來代替蔡瑞月舞蹈研究社公開招標的形式。因為現此時招標的制度是所有的人攏會當來標，基金會煩惱這个空間佮歷史會自按呢斷站。
蔡瑞月予人號做是「台灣現代舞之母」，二二八事件了後予人掠去火燒島關3年，經過種種的打擊，蔡瑞月選擇離開台灣，由𪜶厝內的人共舞蹈社接起來。毋過1994年政府想欲改建舞蹈社，所以藝文界就發起搶救的活動，總算佇1999年予舞蹈社變做市定古蹟，避免改建的命運。這擺舞蹈社敢閣會當逃過難關？
【火燒島政治犯醫療團】
綠島感訓監獄也就是「新生訓導處」，是白色恐怖時期政治受難者發監執行上主要的監獄。其實遮的「新生」大部份攏是智識份子，有醫生、老師佮農業專家，𪜶對火燒島的醫療、教育佮農業攏有誠大的貢獻。
較早火燒島的居民攏有去醫務所揣政治犯看病的經驗，新生訓導處醫療所就袂輸是台大教學病院的火燒島分院，甚至官兵的太太生產嘛會叫新生去共做。啊若是有教育背景的新生會予叫去上課教冊，所以有一段時間綠島的升學率是足懸的。
10/27 禮拜日暗時七點半，綴台灣記事簿先來了解蔡瑞月舞蹈的延續，落尾才閣來熟似火燒島政治犯醫療團。
